ماذا كان سيحدث لو كان وليد سليمان سجل التعادل من فرصته أمام السنغال؟ أو لو كان عرفة السيد وجه رأسه ناحية اليسار ودخلت كرته الشباك.

كل شيء كان سيختلف بالتأكيد، فالفوز أو التعادل مع السنغال كان سيغير مصير مجهول ينتظر شوقي غريب، ووصلات من الهجوم في الإعلام على لاعبي المنتخب واتحاد الكرة.

بعد المباراة باتت تسديدة وليد سليمان التي علت العارضة كابوسا يراودني كل فترة، فأوجه له عتابا داخل نفسي ليس له فائدة، وأتخيل لو كانت سكنت الشباك!

المشكلة هي أنك عندما تسرح بخيالك كمشجع تحول حلمك من كأس العالم إلى مجرد التأهل لكأس الأمم، ستجد أن هناك من سيقتحم حلمك بكل سخافة!

هؤلاء اقتحموا المشهد الرياضي وباتوا هم أبرز نجومه بحكم مواقعهم.. فاقتحموا علينا أحلامنا وبدلا من مساعدتنا على تحقيقها، لعبوا الدور الأبرز في أن تظل أحلاما ولا يبدو أنها ستتحقق قريبا.. إن لم تتحول إلى كوايس أساسا.

-------

"النهاردة منتخب مصر رد على كل اللي شككوا في الرجل الوطني المحترم شوقي غريب، مع أني ليا عتاب عليه أنه لعب بالولد اللي اسمه صبري رحيل".

"يا كابتن شوقي، الولد دة ساب الزمالك عشان يروح الأهلي، وانت كدة بتعمل فتنة بين جماهير الفريقين"

- سيادة المستشار، النهاردة عايزين نكلم عن الفرحة والإنجاز ..

"أنا عايز أقول أننا شفنا النهاردة الجمهور المحترم اللي جاي يشجع منتخب مصر، مش الولاد بتوع الأولتراس الممولين وعايز أقولهم".

- سيادة المست...

"أهاليكوا باسوا الأيادي يلا انت وهو، وبالنسبة للصحفيين فدوركم جاي".

- شكرا سيادة المستشار، وننتقل لكابتن مدحت وضيوفه في الاستوديو.

-------

وزير الداخلية يعد عودة الجماهير في الدوري تدريجيا

"شكرا مرتضى بيه منصور على روحك الجميلة دي، ودة اللي متعودينه من حضرتك دايما، وننتقل لزميلنا في المنيا وانفراد قوي جدا، يلا ورونا معانا إيه".

- أهلا يا كابتن مدحت، النهاردة احنا في بيت عائلة وليد سليمان، والفرحة مالية المكان بعد ما ابنهم جاب جول مصر.

تحب تقول إيه يا حاج النهاردة؟ وتوقعت أن وليد يسجل؟

.................

وعايزة تقولي إيه يا حاجة لكابتن مدحت؟

................

الصوت ينطلق من الاستوديو نحو المنيا: قلبك رفرف يا حاج مع الجول؟

...............

-------

مكافأة إجادة للاعبي المنتخب على الأداء الرجولي

- مش قلتلكم هتعدي؟ ها صدقتوني دلوقتي؟ مش قلت من الاستوديو دة ومن شهر أن الراجل دة مفيش زيه في مصر.. رأيك إيه يا فيلسوف ؟

"فرحة جديدة للكرة المصرية النهاردة، عشان قلبنا كان على قلب بعض.. الحب اللي كان في المدرجات كان واضح على اللاعيبة والجهاز الفني يا شوبير".

- عايز أقول لكابتن شوقي غريب وهو صديقي العزيز جدا النهاردة أثبت نفسك وأنك الأنسب للمهمة دي، واحنا هنا كنا جنبك وبنساندك طول الوقت.

-------

في قناة ثالثة، يجري سيف زاهر الإعلامي وعضو مجلس إدارة اتحاد الكرة والذي تعرض قناته كواليس منتخب مصر حصريا، اتصالا بعمه سمير زاهر رئيس مجلس اتحاد الكرة السابق.

"النهاردة أنا عايز أقول، أن مجلسنا هو اللي أهدى مصر شوقي غريب، لأننا أول من منحناه الثقة في جهاز حسن شحاتة".

"ودة طبعا يدعمني في الانتخابات الجاية لاتحاد الكورة".

- شكرا يا كابتن سمير، ونروح لمهيب نشوف معاه مين ..

-------

اتحاد الكرة: شوقي غريب مستمر حتى 2018 على الأقل

- الكابتن حسن فريد بمسي عليك، وفرحة النهاردة الكبيرة وعايز أقولك مبروك على الإنجاز.

"أنا عايز أقول أن اتحاد الكورة كان موفق جدا في التمسك بشوقي غريب حتى 2018، وعايز أقول للناس شوقي معانا 4 سنين ولسة 4 سنين بعدهم كمان".

"وكفاية أن شوقي غريب أنقذنا من اللعب مع آكلي لحوم البشر".

-------

"عايزين نقول يا كابتن مدحت أن لو كان شوقي غريب لعب ضد السنغال وشخصيته منفصلة عن المباراة مايكسبشي.. لازم شخصيته يسوق بيها المباراة.. القراءة الذهنية والفكرية، يعني انا كاتب في الورقة إن مباراة النهاردة كانت عايزة مراحل الانسجام والذهن وهما القرار، الكورة مش خناقة".

فاروق جعفر المدير الفني لاتحاد الكرة.

للتواصل مع الكاتب عبر تويتر ناقشني Follow @AmirAbdElhalim

ناقشني عبر فيس بوك

Amir Abd Elhalim