اخيرا وبعد ان اقتنع جوان جوسبارت رئيس نادى برشلونة بان المدير الفنى الهولندى للفريق لويس فان جال خرب الدنيا وقعد على تلها قرر الاتفاق معه على فسخ العقد والرحيل عن الفريق الكاتلاونى وكسروا وراه " قلة".

واتفق بعدها رئيس النادى الموقر اللى هيكمل عليها هو كمان على تولى كارليس ريكساش مسئولية الفريق مؤقتا حتى يتم تعيين مدير فنى اخر بديل.

ولكن المضحك فى الموضوع ان رئيس النادى خرج بتصريح عبقرى زى بقية تصريحاته الكوميدية بان الفريق لن ياخذ قرار سريع فى المدرب الجديد ولابد له من التريث قبل التعاقد مع المدرب الجديد "كلام كويس"

ولكن "والكلام ليه برضه" يجب الاسراع بالتعاقد مع المدير الفنى الجديد قبل مباراة يوم السبت القادم مع فريق اتليتكو مدريد على ملعبه فيسنتى كالديرون!!!!!! يعنى منين عايز يتريث ومنين عايز يخلص التعاقد ويختاره من بين المرشحين قبل يوم الجمعة؟؟ مفيش اى منطق.

بجد انا كده اتاكدت ان ازمة البارسا كانت فى المدير الفنى الهولندى اللى مشى الحمد لله وريح دماغ جماهير البارسا ومشترك معه فى الازمة بدرجة كبيرة رئيس النادى اللى ينفع يحل محل اى ممثل كوميدى على اى مسرح.

رئيس النادى قدامه اختيارات وعايز يتريث علشان ما يغلطش وفى نفس الوقت عايز يتعاقد معاه قبل المباراة القادمة!! وحتى لو ده حصل معنى كده ان المدير الفنى الجديد هيمسك الفريق فى المباراة الجاية طيب ازاى هيجيبوه من الدار للنار يعنى؟؟؟

مفيش حل لفريق البارسا ده غير ان مجلس الادراة كمان يتحل لان بجد بيتخذ اغرب قرارات شفتها فى حياتى مرة فضل متمسك بفان جال لحد ما خربها وبعدين مشاه وبعدين عايز واحد بسرعة وبتريث ده غير طبعا التصريحات الكوميدية لرئيس النادى العبقرى.

وللحديث بقية انشاء الله